ما كاين بـاس
...
مرحبا وما كاين باس
العقبة ف وجه لحباب حدورة
طعام الحرف بيناتنا أساس
والرفاﯖـة سلالة مبشورة
سعدات الحالب منها لقياس
وجرْدَت ف مطيرتو لبحيرَة
باب الصبر ما عليه زحام
ليام سوانتها معدودة
ف سماها محوّم آدم
والفانية عريضة ممدودة
لمزمم ما راكع لحكام
وكتابنا ديوان
نشيراتو معروضة
السما ما ليها ظل
الشمس حارة وعنيدة
لغيوم ف غير مسرابها تجفل
وربيع الوقت غلاه لمصيدة
الطريــق تتسنــى
واللي هبى جمرو ينفخ عليه 
العقبة واقفة ولحدورة زرابة
مول لمليح باع وراح
والحـر بالغمزة
اللي ضرباتو يدو ما يبكي 
الدرسة مغيزة
الريح معكاز
الصابة ... لازم تصفى
النادر ياخد حقـُـو
واللـي كيـّل وزن
راس السوق احسن 
الفرﮚ لموقر يجيب الهيبة
والمعزول منعوت بوشام السيبة
بوح الحال تيبري 
ضو النهار ليه بنـّة
والليل يكسي ويعـري
لفجـر ليه مقامو 
والظلام لابد يسري 
الحكمة تلبسها ليـام
ويعيش فلان بلا حزّة 
بالمعنى يتساوي لمقـام 
والسوق اللي كان البارح غمزة
يصبح اليوم كـلام
 …