مـولات الخبــزة

مـولات الخبــزة

‏21/8/13

...

نص الحكاية للشاعر الزجال والباحث محمد الراشق

تم تحويلها زجلا بقلم الزجال بنعيسى الحاجي

يا سادة يا كرام

1

كانْ يا ما كان

والكونْ مالكـُو الرّحمان

حتى كان لحبق والسّوسان

والصـلاة على نبينا العدنــان

غادي نحكي لكمْ حكاية غريبة

مفهومة ماشي صعيبة

وﮔلستي معكم غ تكون حلـُوَة ولبيبَة

كان ف شي وقت من لـوقات

كتعيش واحد العائلة فيها غير لبناتْ

وحدة ربيبة وثلاثة شقيقات

كان بّاهـم تيعاملهمْ مُعاملة وحدة

ما كاينْ فرقْ بين البكرة ولآ الصغيرة

كلّ وحـدَة عنـدُو أميـرَة

لكن أمهم دايرَة فرق كبير

بيـن بناتهـا وربيبتها

حقد وكراهية ولوم كثير

وحالة لغبينة فاش معيشاها

والقهرة فيها عقل يحيــر

واخ واييـه علاش مربياها

من كبرت ذيك الربيبة ووْعـات

ولات هي اللـي كتقضي وتنضي

بحال اللي ف الزمان جابت ودّات

ومن حيث كتقضي الشغل وتفضي

كتفرزها على ذوك لبنات

صابرة مسكينة ومع الزمان كتعدي

/// ــــــــــ ///

يتبع

مـولات الخبـزة

, ‏21/8/13

...

نص الحكاية للشاعر الزجال والباحث محمد الراشق

تم تحويلها زجلا بقلم الزجال بنعيسى الحاجي

يا سادة يا كرام

2

وحيث تعيّـطْ ليهــا

بكثرة الخوف

تلقاها كترعَدْ حداها

كتسمع وتشوف

بشي كلمة نطقت يا ِويلها

وبّاها غير تيمسّـق ويشوفْ

بلمكايدة يباشل تيفوّج عليها

لســان لبيب وكلام مألوف

وهي دايرة ما عليها ما بـِهـا

واخ مقهورة وشبعانة غيلوف

كتهبش وتنبش بظفار يديها

كل واحد عندها بڭانتو معروف

حادڭة ف لمْناوْلـَة وشغل الدار

كتغربل وتقعـّد وكتعجن

وتعاين لعجينة حتى تخمـر

ف خبزة مرات البـُو كتسمّن وتدهن

بالمعنى كتفهم بشوفة النظر

جوابها على نابها تلـدّد وتبنـّن

رسيون لكل واحد تقسَم وتفـرّق

وتباشر لمرضود فوق مناصب الكانون

مرّة مرّة تحرّك وتمرّق

ايلا قل ف الـﮔدرة لبيون

عينها تدمع وصبعها ف راسها يطرطق

تخوي الشكوى وتمخضْ المحـﮔون

ما تدوقشي جغمة ولا تلوَك بلسانها الشـدق

عقلها كلـّـُو صبح ف شغل الـدّار مرهون

/// ــــــــــ ///

يتبع

مـولات الخبـزة

‏23/8/13

...

نص الحكاية للأستاذ محمد الراشق

تم تحويلها زجلا بقلم الزجال بنعيسى الحاجي

يا سادة يا كرام

3

ف واحدْ النهارْ جاعت

وُنسَـاتْ كيف وقع ليهـا

من خبزَة مْرات بّـاها نبْزَت

ويمارة النبزة بانت فيها

الخوف سكنها وف أمرها حارت

لحبيبة يامّي ﮔالت ليها

لا تلوميني ف الحزّة

يلا ف حقك خطأت

أنـا غيـر نسيـتْ

وغفلتي يامّي كِندير لِيها

بلا ما نشعـر من خبزتك نبزت

ويلا ما سمحـتِ ليـش فيها

غاديا ندبّرْ لك ف بحال خبزتكْ

نشقى ولا نسعى ونجيك بهـا

غير بلا ما نهـز قرصتكْ ولاضربتكْ

قالتْ ليها والو من خْبزتي نخلقْ

يلا ف السما جيبيها ولا ف لرض طلعيها

حتى حلّ مْعاها ما لاق

وبْدات تعايرْ وتسبّْ فيها

تضربْ وتهرس وتهرّق

وترمي اللي لقاتْ ف يديها

والبنت مسكينة بالخوف غاديا تحمق

ما نفعوها غير رجليها

كتجري وتزيد تجري

مرّة تعثر ومرّة تطيح

ومْرَات بّاها تابْعاها

بجهد وقـوّة كتغوّت وتصحيحْ

بغيتْ خبزتي ـ ـ ـ وعلاش نبزتِها

ومن حد البنت كتسمع ذاك لغوات

وهي كتجري والخلعة لاسقة فيها

خيالها ما بقى يظهر ع العين غبرات

وسط الشوك تلفت والخش داير بها

ف عيشتها بقات تقدي باش لقات

يمارة الجوع بانت فيها

وكتطل على مرات بّاها واش عيات أُولات

/// ــــــــــ ///

يتبع

مـولات الخبـزة

25/8/13

4

يا سادة يا كرام ‏

ف واحدْ النهار بغاتْ تبدّلْ لمكانْ

تلقى فيه الراحة ولطـْمئنانْ

ف طريقها مْشاتْ وعْيات

خوات مكـان وعمرت مكان

فـدان عرصة وجنان

وطيور غريبة عشاش وغابات

بالصدفة لقــات جنان

محاديه عْزيب كثير البنيان

واسوار منيعة ف السما علات

لا غاشي فيه لا ماشي

ولا حد عساس عليه

غير طلـّتْ وْدخلتْ

ف مُرادها تتأمن فيه

شربت بعد عطشها

من عيونو لكثـار

وبحر جوعها

كلاتْ من خير لشجارْ

حسّاتْ بالراحة وغلبها النعاس

على ربيع لرض تمدّاتْ

ارتاح البال وتـْحَـد الباس

شوية وهي تسمعْ شلا أصواتْ

وهدير داوي خيل وناس

كان بعيد ولى قريـب

نهي وآمر كلام رايم لقياس

واخ ونعم آس بلا تعقيب

بالخف تحلوا جميع البيبان

كل خديم ف شغلو راد البال

بدات لمساوية ف مقام السلطان

آمر تعمل نقاوَة وتخمال

بالبطر تنصبوا لخيــــام

تبدلت النظرة ولعزيب زيان

منا فينا لهْـلا يخطي لحْكامْ

المرسم ف تاويلو يعجب السلطان

وذيك البنت غير شافتْ ما شافتْ

بقـات مبهوضة كتخمّم

وبان ليها بْحال اللي حصْلاتْ

تزكمات وما بقات قادرة تتكلم

بدات تقلب غير كيف تدير تفلت

خمّمتْ وزادت ف التخمام

ف شي حيلة منْ الحيلات

شويَة وهي تدخل وسط لغنمْ

حوالة خرفان ونعجات

ف الزريبة جنبْ البير اللي كاين تـم

/// ــــــــــ ///

يتبع

مـولات الخبـزة

‏26/8/13

5

يا سادة يا كـرام

وبصلول السلطان لعتاب لقصر

شاف يمين وشاف شمال

وكيف العادة عجبو لمنظر

متعة ونزاهة كل شي متوّل

وحيث ارتاح من بعد السفـر

من علو المنزه ع لفدادن طـل

مع لوزير دار ﮔلسة وتعنـﮔر

زيان لمقام بالخيرات لا تسأل

بان لو ف السما تيحوّم طير

فوسط الشجر طوى جنحيه ونزل

السلطان طلبْ مْرايتْ الهند تبعو بالنظر

يتمعن ف خليقتو ويتأمل

شاف ذاك الطير ف عشو لاﮔـي لوقر

وعولة فراخو من جوفو كتنزل

ثنّى بالشوفة ف العرصَة والجنان

شاف الورد بجمالو تيغيب ويعاود يظهر

شاف الفاكية قبل الوقت بغات تبان

والنحل تيراري باوراق الزهـر

سرحَت به الشوفة للزريبة

بان لو منظر وسط لغنم لونو كحل

توسوس راسو بالشك والهيبة

ﮔال لوزيرو هاك تشوف بلا ما تعطل

كيـف ما شـفت انا وسط لكسيبة

بان لي بحال شي خيال كحل

/// ــــــــــ ///

يتبع

الخبـزة

‏29/8/13

6

يا سادة يا كرام

ﯖالـّـُو لوزير اييه يا مولاي

حتى أنا شفت ما شفتي ف الزريبة

شوفتك صحيحة ما تخطا شـــي

شي حاجة كحلة هاديكْ وسط لكسيبة

لكن يامولاي جرّتها ساهلة ما تخمّمشي

وحتى حاجة عند وزيرك ما صعيبة

بغيت يامولاي تـُوْجَد شي قصعة تريدْ

يكـون مالحْ ماشي مسّوس

عليـه فروج بلدي بزايد ولذيـذ

باش نعرفوا كنسو من لكنوس

الإنسي يلا فيهْ الجّوع ياكلْ ويزيد

والجني ما يقرّبْ لـُو غير يلا كان مسوس

وهذاكْ الشي ما كان يا لخوانْ

كـلات ذيك البنت وبرداتْ

من البير غرفت وشربت كيسان

نفضت جلالها وعاود ڭلسات

تعرفت باللي هي إنس ماشي جان

سرها تكشف حدرت عينيها وحشمات

ف الحين وصلت لخبار للسلطان

ﯖالهم حضّرُوا قدامي اللي كان

من قوالو نعرف العنوان

ونساعدوه يرحل لفيـن كــان

/// ـــــــــ ///

تابع

من طرف **بنعيسى الحاجي** الأحد أبريل 29, 2018 3:19 pm

يا سادة يا كرام

2/9/13

7

كساوْها لخْدَم بشي لـْحــاف

بلقاء السلطان وصّاوْها تستعد

حضْروها ﮔـدامُـو بالخــــفّ

وهي مخلوعـة وكـترعَـدْ

حتى تلاقاوْا سنانها بكثرَة الخوفْ

أمرهـم ﯖـدّامُـو يخلـّيوْهـا

تـرُد نفاسهـا واتقـــادد

وعاد يطلب منها تعاود لـُو اسرارها

المفيد يفيد واللي ما ساوي يتحيَد

ومنينْ شاف فيها وتمعّنْ

شافْ قدّاموُ جمالْ تيفتنْ

فتحْ عينيه مزيانْ حتى تيقـّنْ

قرّر يرحل حيث عقلو بها تـّشطن

ﮔال لوزيرُو اليوم نزلتنا تكون ف لقصر

أمرهمْ يْوَا بالرحيل وب لبطـر

وذيك لبنت حتى بشي حاجة ما تشعر

تهـلاّوْ فيها أُوَلفـوها معكم تهـضر

/// ـــــــــ ///

تابع

من طرف **بنعيسى الحاجي** الأحد أبريل 29, 2018 3:21 pm

يا سادة يا كرام

2/9/13

8

وحيث وصلت للقصر وارتاحت

شافت عينها ما شافت

ف اللي ما كانت تحلم به صبحتْ

وكثير شي منين استحمّت ولبستْ

عاد ارتاح البال وتاقت

وتـْكـنـّات هي للاّت لبنـاتْ

المنزه لها مقام فيه ﮔلسات

متعة ونزاهة ف لعراصي وجنانات

وهكذا يا سدَة يا كرام

علنوا على عرسْها ف قصر السلطانْ

وذيك البنت تفاجأت ما نطقت بكلام

بهاذ العزّ لعظيم اللي ف سعدها بان

دازت حفلة العرس كيف رادت وبغات

دوَات الموسيقى والناس رقصات

وحتى الطيورْ بغناها شـدات

هنِيَ وهنِيَ من الخبـزة تهنـّاتْ

فرحي وسعدي يا لرّيمْ يا زينتْ لبناتْ

سبحان الله اللي كرمها بهاذ الخيرات

وبا لزربة على الجوّ الجْديدْ تدربات

وكل يومْ كتدوَز فيه أحسن ساعات

/// ـــــــــ ///

تابع

من طرف **بنعيسى الحاجي** الأحد أبريل 29, 2018 3:24 pm

يا سادة يا كرام

4/9/13

9

واحد النهارْ سَمْعَتْ صوت حزين

من بعيد تيسعى نسعاوا الله كاملين

وذاك الصوت شحال كان حنين

عرفتها ولية ما خانهاش سمع الودنين

أمرت الوصيفة تدخلها وتغسل ليها

ومن الخيراتْ تعطيها

حيث عقلتْ على اشْـداز عليهـا

ومْرات بّاها كانت بلا غْـدَا تخليها

ﮔالت ليهمْ ليَـا قرّبوها

وخليوني وحدي مْعاهـا

بغيـتْ نرتاحْ حْداهـا

تعجبوُا وْاستغربُوا ف قولهـا

ف لكلام دّات وجابت معهـا

عقل الصغر ثبات وهي تعقـل عليها

مع بالها قالت هَذي هي مْرات بّـا

يـاكْ ما غير دايْـرها سبّـا

لكن لمْرا عليها ما عقلاتْ

حيث البنت تبارك الله كبرت

تبدّلـت حالتهـا وزيانـت

قالت ليها واشْ عْرفتيني

قالت لها اللي نعرفهمْ بـزّاف

كلام لسانك ما حلاه غير فكّريني

قالت ليها "البنت"وفين بُويا وخـّـُوتـي ؟

ردّتْ عليها وقالـت

آه عليكْ ـ ـ انت اللي من خبزتي نبزتي

ودرتي بحال يلا خفتي مني وهربتي

ايـوا دابَـا عـاد حصلتي

عطيني خبزتي ـ ـ عْطيني خبزتي

وبـدات تعيـط بلغـواتْ

وعلى لخصام معاها نـوات

وهي تآمر حارسها الخاص

يدّيها خارج لبلادْ ويسكنها فدار لجوادْ

ويديرها بحـالْ شي طيـر ف لقفاصْ

ما يخصّها خيـرْ ولا زاد

غير لأكـْل والشرب والنعـاسْ

ومازال الطيـرْ تيغنـي

أما لآله هنو ما تفركن ما تدَنـي

وعلى كل حـالْ

كيـف تيـﯖـولْ المثـلْ

راكمْ سيداتي وسادتي ديما ف البالْ

ما نكمّلشي لكم لحكاية هذا مُحـال

/// ـــــــــ ///

تابع

من طرف **بنعيسى الحاجي** الأحد أبريل 29, 2018 3:28 pm

يا سـادة يا كـرام

4/9/13

10

السلطان الهمّـامْ للمَلِكــة ﯖـــال

بغينـا نتفاجاو ف جنانْ لخضارْ

شحال هذي ما شفت السّانية والشلال

تمـّا الڭلسة تزيان ويحلى النهـار

ﯖالت لـُـو أمركْ موْلايْ يتنفـّدْ ف الحالْ

يرتاح البال والعين تتمتع بالنظـر

تنعم بالشوف ويتغير حـال بحـال

واللي عاش وشاف حنـّت لـقـدر

آمَر تعملْ الملك كيف راد ارحلْ

ومن الباب لكبير دَيال الجْنانْ دخـل

الفاكية انواع والورد من كل شكل

آش تحصي فوق ما يتصوّر لعقـل

و سعـدات اللـي جــاع

ف ﯖنس الفاكية ياكل حتى يشبع

ويتنزّه كيف راد من الشوف ما يقنع

العاطي برزقو قادر ما يتعجن ما يتصنع

واد بقناطر وشلالْ ميّاهو اتقاطرْ

والغلـّة طايبة عشاقة للنظـرْ

وراق الدّالية بلونها لخضر

والنحل بين لعناقد بصوتو يهدر

وسبحان الله

عنقود ابيضْ ف جنب عنقود كحلْ

منظر بجمالو يفتنْ

الورد منو شلا وصفو ما يتكمّل

لِقامة والشيبة احواض لها مسكن

الطير تيغرّد مرّة مرّة يتبرّم ويطل

والملك ف المتعة خاطرُو تهـدّن

حْلات بينتهمْ الـﯖلسة

ورطاب الخاطر بقول الشفة

لمقام محضي بعين العسّــة

بَزْمَن الرتاج يروم للدفة

وما بين ضحـى ومْســا

فـاض القلب صدق ووفـا

/// ـــــــــ ///

تابع

يا سادة يا كرام

7/9/13

11

بالصدفة نبتوا جوج عويدات

ما تنبْهت لهـم لأنظــار

كل عين تتشوف فين بغـات

والملكة سمعت بيناتهم الشِّجَـار

قطيب تيقولْ عطيني خبزتي

ولآخـُر تيقول ليه ماعنديشْ

وهي بقات بالضحك تتصَيّكْ

وجّهْ ليها الملك سؤالو بالخف

إيوا ضحكينا راحْنا زعْما حْداكْ

تفافات ولسانها ع لقول تلـف

قالت لـُو ايوَا غيرْ ضحَكتْ وْكانْ

ﯖالها ما كاينشْ شي ضحكة بلا سبّة

انا وياك ما مثالثناش شي إنسان

وبْغا يديرْ من الحبّة قبّة

وْدارْهـا

بغواتو شعلت نارْهـا

ومنينْ بغاتْ تداويها عْماتها

ومن خرجتْ كلمتها القات التخمام فاتها

قالت لـُو يا مولاي :

اللي ضحكني هو ذاك المنظـر

عنقودْ ديال لعنبْ لكحلْ معنـّقْ لبيضْ

فهمْها غلاطْ وطرشها بجهدْ وحـر

حتى بقات قدامو كترعد

وما كْفاها تعياطْ ولا حلوف

قالْها ما قنعتيش بهاذ الـﯖلسة بين يديـا

العبد اللي غراك راسو بيدّي يتقطف

وانـتِـ خرجتِـي خطيـَة

وحكامكْ غادي يكونْ قاسـي

ولغدرك ما ناسي حتى نموتْ

هوْلو مزمّم في راسي

ب لِمَارة هاذ لمكان به منعوت

وانا بفعلتك نعاني ونقاسي

ولهلا ينزّل علينا باطل آلخوتْ

راس العبدْ بسيفو طارْ

هاذ السرّ ما تعدات خبارُو باب لقصر

بقـا رايج غير ف وسط الـدّارْ

ومْرات السلطان فكل ليلة كتنفـّد القـرار

كتحَمّلْ الرّاس المقطوع

وكتطوفْ بهْ ف لقصر من قنت لقنت

آشْ هاذ لعذابْ اللي عليها مصنوع

لا سماحة لذوك لعويدات اللي بسبابهم ضحكات

كـان هذا هو السبب

ف هاذ الشْقـا ولعْـذاب

بالحق كلشي مقدّرْ ومكتابْ

ونـا مازالْ مْعكـم يالحْبـَابْ

/// ـــــــــ ///

تابع

يا سـادة يا كـرام

‏7/9/18

12

ف شـي يـومْ من ليـَامْ

حكيمة النسـا نجمـة

قلال الشي بين ييها خير وسلام

وقصدت ْ دلالة مفهومة

ف الرحبة هـضرة وكـلام

تبيع لها جوهر سـوم وقامة

قالت ليها هاذ ليّامْ السوق باردْ

والحركة عيانة

على الشرا ما كيزعم حـد

وانتِ سلعتكْ لايقة ومزيانة

لكن الغالبْ الله

ويمكن تبعيهْ لمْرَاتْ السلطانْ

كل رزق تيكتاب لمولاه

لمْرَا عشـّاقة والكلمة عندها نيشان

غير سيري راها تتسخى بالمالْ

لحكيمة شاوْرو عليها لمْشاوريَة

ودَخلوها ب لعناية لقاعة لاستقبال

قالت لهم غادي نسلـّمْ للالة لبناتْ هاذْ لهدية

الملكة دارت بحالْ اللي ما عليها ما بيها

رحبتْ واستقبلتْ وف وْجَهـّا ضحكـت

تعاودو ﯖاع لخبارات وما خلاو حتى جهة

وخبارْ لقصر ما دات فيها الدلالة ما جابت

بان باللي ما وصّلها حد من لخدم لمَحَلـُو

وبداتْ الهضرة ف اللي الملكة به والفـت

واش اللي ف يمين الملك ولى ف شمالـُو

الملكة بكلام الدلالة لحكيمة حسّـت

وردّت عليها خاطري أنا لهلا يعطيك بحالو

غيرْ يظلام الحال وتشوفي حالتي كيف ولات

وتفرجي على عذابي بأمر الملك وافعالو

الدلالة لحكيمة ف الركينة تخبعات

شافت وتبهضات حتى دموعها سالوا

وْبعينيها لذوك لغرايب ولمحاين ما صدّقات

/// ـــــــــ ///

يتبع

يا سـادة يا كـرام

9/9/19

13

وحيث كملت الملكة حصة لعذاب

لحكيمة بقـوّة الخلعة سخفــات

رشـّتها بالمــا تقرقب النـــاب

ولعقلهــا رجعــاتْ

ﯖالت ليهـا إيو كيف جـاكْ عذابي

ردّت عليها هذا قدر الله ومكتاب

ولكن غاديا تفاجايْ بسبابي

والعبد كان غير سبابْ

الله غ يفتح عليك بيبان الخيـر

غير حلي وذنك وسمعيني مزيان

بقدام الربح انا جيتك والتيسير

وانتِ وشمي كلمتي ف هادْ لمكان

غدّا منين يبغيوْا يْحَمّلو ليكْ الرّاس

ما تطوعي ليهم أمر باش ما كان

وعَلـّي عليهم صوتك بلا قيـاس

حتى يجي اللي عليهم شان

وحيث يسوّلكْ على رفض عذابك بهاذ الراس

ﯖولي لو ماشي انت هو قحطان بن زهران

سلطان قوي بالحكمة مشهور بلا قياس

وذاك الشي يا سداتي اللي كان

خمّم ودوّر ذيك الهدرة ف الراس

واش كاين أشهر مني شي سلطان ؟

ردت عليهْ وﯖالت سوّل حكيمْ الشجعان

وغـيـــر جاوبـو بـيـيّــــه

جمـع العــدّة والعتـــادْ

وﯖـاع اللي يحتاج ف طريقو ويبغيه

ولغـَـدْ ليــه خـوى بكـري لبـــلادْ

/// ـــــــــ ///

يتبع

يا سـادة يا كـرام

10/9/13

14

ومشى مشية الشجعان

بعد ايّامْ وصل لبلاد المقصود

وباش ماراد الله يكون كان

سبحان الله المعبود

بٳرادتو تيمهّـدْ لاسبـابْ

وذيك البنت بعدا تهنـّـاتْ

ف هاذ المدّة من لعذابْ

وذاك الشي هي النّيث اللي بغات

استقبلو قحطان بن زهران

وبعد راحة لعظام

حكالو كل شي ذاك السلطان

وكيف وقع لو مع زوجتو بالتمام

جاوبو قحطان ــ ــ ــ وﯖـال

اللي بان لي غير الشكّ عْما عينيكْ

كون غير تسنيتي شي ايام قلال

حتى تتأكد وتشوف بعينيك

دابا راهْ خيطْ لمحبّة تقطع

وبقات عينين الملك كتدمع

قالو يا سلطان لا تبكي عندي حلّ

تاخدو من عندي عادْ ترحل

هادو ثلاثة دَ لـﮔرﮔاعات

مبخرينْ بهوى لبنات

وغير توصل بعد وقت قليل

عطيها تهرّس اللولى فنص النهار

والثانية ف نص الليل

والثالثة مْع لفجـر وزيد صبر

راه ربيع لمحبة غادي ينبت

وتعود كيف كنتي مع ذيك البنت

/// ـــــــــ ///

يتبع

يا سـادة يا كـرام

‏13/9/13

15

وكانت هادي من قحطان غير سبّة

بلا ما يدير ف اللي بغا من الحبة قبّة

والسلطانْ بعد مدّة لبلادو وصلْ

تقــرّبْ من ذيك البنت ورغــبْ

ودار بحال اللي تيبغيها وامتثل

وما يعاود عليهـا يغضـــب

وماجات فين تكمل تهراس الكركاع

حتـــى سمعــت حركــة بصـداع

عفريت ظهر ﯖدامها ف لمكانْ

وقالها أنا مأمور ناخدكْ ف الحالْ

لعند الملك قحطان

وبلا ما تفكرّ اتحْسمْ لأمر كيف قال

وقف قدّامو ومعه البنت جمالها فتان

شاف فيها وعاود شاف

وﯖال ربي تيعطي الفول لللي ما عندو سْنان

كيفاش يتخلق بينو وبين هاذ الزين الخلاف

ومنين عجباتو ولاقت به

سوّلها على صداقها

يلا بغات تتزوج به

قالت لو صداقي شروط تنفدها

تجيبْ لعزيز عليا واللي كنبغيه

من خوتي صلة الرحيم معهم نحييها

وحتى بّا يلا كان عايش تحضريه

ومراتْ بّا ربّاتني ومازلت كنبغيها

وآمر تعمل العفريت جاب المطلوبْ

والسلطان قحطان حقق المرغوب

والسلطان لقديم مات من لكروب

وانتما يا سادتي على الله تكونوا متعتوا لقلوبْ

والصابر فينا هو المحبوبْ

وبنادم راه حجر وطوب

وهكذا حجايتنا مشاتْ مع الواد

ونا بقيت معكم يالجـواد

/// ـــــــــ ///

شكرا لكم إخوتي الكرام على تتبعكم المتواصل

وتفاعلكم الفني مع مضمون حكاية مولات الخبزة

كما أدعو لأخينا المرحوم محمد الراشق

بالرحمة والتوبة والغفـران

تحيتي الخالصة

....

مـولات الخبــزة

مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة

رد: مـولات الخبــزة